Мавр Абдуллин жастармен бейресми кездесу өткізді

Мавр Абдуллин жастармен бейресми  кездесу өткізді
09.08.2019 Жалпы

Кеше белсенді жастар қала әкімі Мавр Абдуллинмен кездесті, деп хабарлайды қала әкімінің баспасөз қызметі.

«Солнечный» демалыс орталығында білім беру, мәдениет, спорт саласында ерекшеленіп, көзге түскен 30-ға жуық жастар жиналды. Бейресми кездесуде жастар қала басшысымен пікір алмасты.

«Халықаралық жастар күні қарсаңында мен арнайы сіздермен пікір алмасу үшін кездесіп отырмын. Әр ата-ана, әр мемлекет жастарға үлкен үміт артады»-деді қала әкімі Мавр Абдуллин.

Жастар даму жолындағы өз ұсыныстары мен көзқарастарын білдірді. Санк-Петербург қаласында жоғары білім алып жатқан 2 курс студенті Лаура Ануарова 10-11 сынып оқушыларына арналған оқыту тренингтерін жүргізуді ұсынды.

«Көп жағдайда мектеп оқушылары қандай пән таңдау қажеттігін білмей жатады. Барлығы тек грант алуға талпынады. Мысалы, Ресейде  10-11 сынып оқушыларын емтиханға дайындап, бағыттайтын арнайы бағдарламалар бар. Сонымен қатар сенің үлгеріміңе қарамастан, мұғалімдер  оқушыны оқытып, үйретуге дайын", - дейді жас Ақтөбелік жерлесіміз. 

Іс-шара барысында жастарға арналған тимбилдинг, дәрістік сабақтар өткізілді. Сондай-ақ, қала әкімі аймақтағы мемлекеттік жастар саясатын дамытуға үлесін қосқан 15 адамға алғыс хат табыстады.

Айта кетейік, қалада 14-29 жас аралығындағы 115 мыңға жуық жас тұрады.